【手作】【化妝】DIY補妝盒．輕裝上路

【按圖放大】

身為一條冇公主命嘅毒絲，自己顧自己好重要！我又鍾意做獨行俠，出街帶齊裝備是常識吧！咁咪要帶個石頭咁重嘅巨袋出街？唔係喎！我好怕拎重嘢，鍾意幫啲行裝「減磅」，要做到麻雀雖小，五臟俱全！做人太heavy，身外物梗係愈輕愈好啦！

我個化妝袋入面有齊成藥、膠布、補妝用品等等，每樣嘢都係細細件，零負擔嘅！今次要介紹嘅就係……DIY補妝盒！好鍾意啲名牌化妝品嘅「Palette」盒，有齊粉餅、胭脂、光影粉、眼影等等，一盒就可以搞掂成個妝！不過佢哋唔平，而且唔輕，入面又唔係全部嘢啱用，咁不如自己度身訂造啦！

【按圖放大】

首先出場呢個，係改裝自759 Kawaiiland嘅「W7鐵盒眼影Palette」，幾十蚊貨仔（唔記得幾錢喇~），個盒質素幾好，實淨、易開、唔漏粉，方便好用，可惜個樣普通，最近有咗新歡，所以退役了！至於啲眼影好唔好用？都幾上色嘅，但飛粉囉！英國牌子強國製造，不要再說了.jpg

【按圖放大】

跟住到現役嘅，購自Piago超市嘅Peter Rabbit鐵盒糖，$38得12粒咋，都算貴，但醉翁之意在個盒啫！我唔係Peter Rabbit迷，不過見到咁靚嘅粉藍色 + 咁靚復古畫風，都係忍唔住要買！拎出嚟補妝都（自覺）巧威威囉！

【按圖放大】

如何DIY補妝盒：

1. 拎走鐵盒內嘅嘢 / 食晒啲糖

2. 清洗乾淨個盒，放化妝品一定要乾淨

3. 喺要黐鏡仔、化妝品嘅位置，貼上masking tape打底（咁做係因為~第日想搣返啲嘢出嚟時，易清理好多），再用酒精輕輕消毒

4. 準備好化妝品粉餅sss，我揀咗粉底、胭脂/光影/陰影粉、眉粉。如果有補充裝就最好，冇既話就要喺個膠盒度撬出嚟，通常盒底都有個窿仔，用支竹籤篤出嚟就OK了

5. 用膠匙羹刮走晒粉餅底部啲膠，再酒精抹一抹

6. 用雙面膠紙黐鏡仔、粉餅sss落鐵盒入面

7. 放埋粉樸、掃仔ss，完成！

就係咁，你就可以隨時隨地都輕鬆補妝喇！

--------------------------------------------------------------

【科勞！窮絲】
IG ➡ @miss.sisterpoor
FB ➡ http://www.facebook.com/sisterpoor
Blogspot ➡ http://sisterpoor.blogspot.hk
U blog ➡ http://blog.ulifestyle.com.hk/blogger/sisterpoor