作為一名小文盲，冇諗過要寫遊記，中學之後就冇認真寫過一篇遊記！不過最近香港有莫奈畫展（Claude Monet，法國畫家，印象派始祖之一），撩返起我條癮，想講吓舊年12月喺東京睇嘅莫奈展，寫寫下變咗「慳錢一日遊」，六舊水點樣喺東京窮遊一日？去澳門都唔止啦！（利申：前後兩日其實洗咗好多$）
冷酷提示：香港莫奈展得十七幅作品咋，日本有超過九十幅！！
瞓到日上三竿，早餐都冇食就出發（獨遊的好處，唔食嘢都冇人管，不過唔好學我唔食嘢喇），好在我住喺三ノ輪，距離目的地上野，只係兩個地鐵站車程啫，好快就到！由地鐵站，行到去JR站，再行到上野公園，其實好近，不過慢慢行，沿途八八卦卦，望下藍天，都冇計到行咗幾耐喇，自由真好！
路過JR站，個天靚到唔捨得行
去到上野公園，周圍行，兜個圈先！睇下西鄉隆盛像、清水觀音堂、幾間好文青嘅Café，仲睇到最尾一轉紅葉！成個公園都靚，用電話亂咁影都已經好靚！呢日天氣好好，有陽光，有風，又唔凍，加上係weekday嘅關係，人唔算好多（亦冇遇到香港人，呢度冇得shopping吖嘛），真係好好行，好悠閒！偽文青得很！
西鄉隆盛，靠聽《光明頂》講日本史先識
清水觀音堂
公園cafe，有啲美國feel
紅葉期水尾，意外睇到
漸變的紅葉
繼續係紅葉
亂影都靚
繼續亂影
典解會有啲韓劇feel？
落葉知秋........已經係冬天囉喎！
咁多個館，行足一個禮拜都得
行完一round公園，就喺入面嘅美術館/博物館群之中，揀咗兩間去潮聖！
首先係國立西洋美術館，可惜最啱心水+收費便宜嘅常設展覽閉咗館！（明明事前有做功課！點解會咁？！）唯有俾￥1600（百幾蚊港紙呀sosad！）睇「黃金傳說」展，老老實實，我就唔係好識欣賞呢批地中海文物，靚係靚，不過全部金金金，睇到我有啲暈，悶悶哋，好快行完，走人！我係一個膚淺嘅港女！BTW呢個展覧都冇乜日本人睇，個館靜過鬼XD
國立西洋美術館
之後就係東京都美術館，嘩！喺館外面已經人來人往，好熱鬧！有個白痴港女喺門口個「鏡波」前面玩自拍，玩咗好耐XD！好喇！入館喇！本身諗住去美術館cafe醫下肚先，點知一入大堂已經人山人海！因為係莫奈展東京站嘅最尾3日展期，我誤判！我低能！冇預計過會咁多人！都係乖乖排隊買飛+排隊入場先！排咗差唔多一粒鐘，唔知係咪因為太多人，加上會場有啲「焗」，搞到有啲眼瞓+暈暈哋，好在日本人排隊唔會人貼人，加上秩序井然又安靜，還好！
東京都美術館的「鏡波」，有個無聊港女喺度玩自拍玩咗好耐
終於入到場，依然係維園年宵咁，每幅作品都要慢慢等、慢慢排先埋到去，我份人咁cheap梗係睇返夠本先走啦（窮撚冇乜幾多機會見到名畫吖嘛，我又唔係離地中產）！我覺得呢個展覽珍貴之處係，可以近距離睇到大師級嘅真跡，親眼睇到佢有力嘅筆觸、豐富嘅色彩，乘機偷下師！<--我盡咗力講架喇XD！唔識賞畫吖嘛！
幾年前學過幾堂油畫，阿sir話莫奈係一個好幸福嘅畫家，佢唔使等到死咗先出名，晚年過得安逸，日日畫佢屋企個花園啲蓮花，就係呢次展覽之中N咁多幅嘅「睡蓮」(Water Lilies) 嘞！
全個展覽有超過九十幅作品，中段至到尾，差唔多全部都係唔同形態嘅「睡蓮」，除咗睇畫，我又諗埋啲懶好笑嘅嘢：「佢都幾懶改名喎，幅幅都叫『睡蓮』嘅？」
感覺上冇後生時落筆咁出力、色彩都比較淡然，我真係唔識賞畫，如果要簡單形容呢批作品，只能用呢個詞——祥和。
好多好多作品，睇咗好耐好耐，再睇埋紀念品，好多好多，樣樣都好靚，不過我只係買咗一堆迷你folder自用+送禮，睇完出嚟已經天黑喇！
展覽唔影得相吖嘛！唯有影下飛、單張同小小戰利品
究竟去美術館睇展覽喺日本人心目中係咪一件盛事呢？好多人著晒西裝、靚裙（雖然佢哋一向重視衣著），weekday都咁多人排隊去睇，而且唔係好似香港人咁只顧打卡，係堅認真咁睇！連高中生都睇得好認真（仲要唔係學校帶隊參觀）！諗返香港幾年前清明上河圖展覽時，勁多人去搶飛，又有幾多人只係為打卡？
成日冇食嘢，好肚餓！行去上野0101求其食個晚餐，再去MUJI買零食雜物一堆，扭隻Sailormoon扭蛋，再買盒壽司做消夜，就返歸喇！計晒全部洗費，包括飲食買嘢，來回車費￥170x2，展覧入場費￥1600x2，洗咗大約$600港紙！相信冇乜香港人會咁玩法XD
冷酷提示：
日本版嘅莫奈展總共有東京、福岡、京都、新潟四站，最後一站將會喺6月4日至8月21日，喺新潟縣立近代美術館開催！
詳情：
http://www.ntv.co.jp/monet
http://www.teny.co.jp/monet
————————————————————–
【科勞！窮絲】
IG ➡ @miss.sisterpoor
FB ➡ http://www.facebook.com/sisterpoor
Blogspot ➡ http://sisterpoor.blogspot.hk/
U blog ➡ http://blog.ulifestyle.com.hk/blogger/sisterpoor
沒有留言:
張貼留言